Laerskool Bosveld Primary

Beste ouers en voogde

Aan elke ouer, voog en leerder wil ek die seën en genade van die Here vir die jaar toebid.  Met die hulp, onderskraging en leiding van ons Hemelse Vader sal dit ‘n wonderlike jaar wees.

Laerskool Bosveld Primary is ‘n unieke, multi-kulturele skool, met parallelmedium onderrig.  Dit beteken dat Afrikaans- en Engelssprekende leerders in aparte klasse onderrig word, in die taal van hul keuse.  Ons is dus nie ‘n dubbelmediumskool nie.  Laerskool Bosveld Primary is twee skole in een, waar Afrikaans- en Engelssprekendes apart onderrig word in klasse wat meestal nie groter is as 25 tot 30 leerders per klas nie.  Klasgroottes word so klein as moontlik gehou.
Om ons akademiese- en onderrigdoelwitte te handhaaf en uit te bou, stel die Beheerliggaam twaalf opvoeders tot die skool se beskikking wat deur die Beheerliggaam vergoed word.  By Laerskool Bosveld Primary poog ons ook om ’n balans tussen Afrikaans- en Engelssprekende leerder getalle te handhaaf.

Laerskool Bosveld Primary bied aan elke leerder die geleentheid om sy/haar volle potensiaal te verwesenlik deur deel te neem aan ‘n verskeidenheid van aktiwiteite, sportsoorte en kulturele bedrywighede.  Met ‘n puik opvoederskorps, goeie fasiliteite en die beperking van klasgroottes, word die akademie nie agterweë gelaat nie.  Akademie is vir ons van primêre belang.

Mag u en u kind se verbintenis met Laerskool Boveld Primary ‘n baie aangename tyd wees en mag u as ouer/voog ‘n bydrae maak tot die uitbouing van ons visie, missie, waardes en doelwitte.

Vriendelike groete en Persevera!
Louwtjie Pretorius
HOOF
2010