Boodskap van die Beheerliggaamsvoorsitter:

Mnr. N. De Villiers  

 Beste ouers en voogde,
 
Niemand van ons weet wat hou die toekoms vir ons in nie.  Gister is reeds verby en ons kan niks daaraan verander nie.  Die dag van more kan nie aanbreek nie, want sodra die dag van more aanbreek dan is dit reeds weer die volgende “vandag”.  Kom ons fokus dus om die beste te maak vir ons kinders met elke “vandag”.

As ons kyk na die afgelope vyf jaar van Laerskool Bosveld, dan sien ons ‘n skool wat homself in Limpopo, nie slegs Ellisras nie, onderskei het as die bes funksionerende parallel medium skool.  Laasgenoemde stelling is geduldig op papier, gun my die geleentheid om dit te staaf uit die praktyk. Suid-Afrika se politiek verander elke dag met nuwe uitdagings.  Binne hierdie uitdagings moet ons ons kinders voorberei om ‘n positiewe bydra te lewer in die groei van ons mooi land.  Om dit te verseker moet kinders leer om met enige iemand, in enige situasie saam te kan werk.

By Laerskool Bosveld het alle kinders hierdie geleentheid, deur onderskeidelik in Engels of Afrikaans onderrig te word.  Alle klasse (behalwe die kind se tweede taal) word in een van hierdie tale onderrig volgens die keuse van die ouers.  Geen kind word dus benadeel deur ander kinders se taalvaardigheid nie. Behalwe vir die taal, het kinders ook die voorreg om in ‘n multikulturele skool voorberei te word vir die toekoms.  Ons kinders moet leer om binne die diversiteit van verskillende kulture trots te wees op sy eie kultuur en tradisie, maar so dat dit getuig van respek vir ander kultuur groepe.  Geen ander skool in Limpopo behalwe Laerskool Bosveld kon 100% daarin slaag om dit op elke faset: Akademies, Kultuur en Sport te implementeer, sonder enige vorm van diskriminasie nie.

Met bogenoemde in ag, en die dominansie wat Laerskool Bosveld die afgelope paar jaar beleef op akademiese-, sport- en kulturele gebied in Ellisras en op streeksvlak het ons amper ‘n stuk utopia waarop ons werklik trots is.
Gun u kind die beste vir die toekoms, maar help ons om vandag die beste te doen vir elke kind. Mnr  Pretorius en personeel dankie vir julle bydrae in ons kinders se ontwikkeling en sterkte vir 2010.
 
Persevera!
Neil De Villiers
Beheerliggaamvoorsitter

Laerskool Bosveld Primary se Beheerliggaam /

Governing Body: